भारतीय टिममा अश्विन ड्रप, ५ बलरमा भुवनेश्वर र उमेश यादव

भारतका स्टार अफस्पिनर रवीचन्द्रन अश्विन पाकिस्तानविरुद्धको पहिलो खेलबाट बाहिरिएका छन्। उनलाई कप्तान विराट कोहलीले बर्मिङ्घममा केही समयपछि सुरु हुन लागेको खेलमा विश्राम दिने निर्णय गरेका छन्।

पाकिस्तानविरुद्ध खेलका लागि भारतले ५ बलरलाई मैदानमा उतारेको छ। जसमा आइपिएलमा उत्कृष्ट प्रदर्शन गरेका दुई तीब्र बलर भुवनेश्वर कुमार, उमेश यादवलगायत जसप्रित बुमराह र हार्दिक पाण्ड्या रहेका छन्। एक मात्र नियमित स्पिनरको रुपमा रवीन्द्र जडेजालाई स्थान दिइएको छ।

ब्याट्सम्यानमा रोहित शर्मा र शिखर धवनको जोडी, कप्तान विराट कोहली, युवराज सिंह र विकेटकिपर ब्याट्सम्यान महेन्द्रसिंह धोनी रहेका छन्।

भारतविरुद्ध केही समयपछि सुरु हुन लागेको खेलमा पाकिस्तानले टस जितेर फिल्डिङ गर्ने घोषणा गरेको छ।