सकिब र महमदुल्लाको कीर्तिमानी साझेदारी पछि बंगलादेशले हरायो न्युजिल्यान्डलाई

सकिब अल हसन र महमदुल्ला दुवैले सतक बनाएपछि ३३ रनको स्थितिमा ४ विकेट गुमाएको बंगलादेशले च्याम्पियन्स ट्रफीको रोमाञ्चक खेलमा उत्कृष्ट पुनरागमन गर्दै ५ विकेटको जित हात पारेको छ।

यो जितसँगै बंगलादेशको सेमिफाइनल प्रवेशको सम्भावना जिवित रहेको छ भने न्युजिल्यान्ड प्रतियोगिताबाट बाहिरिएको छ। बंगलादेशको जितमा सकिब र महमदुल्ला नायक बने। उनीहरुले पाँचौ विकेटका लागि कीर्तिमानी २ सय २४ रनको साझेदारी गरेपछि बंगलादेशले असम्भव मानिएको जित सम्भव पार्यो।

यसअघि अन्तर्राष्ट्रिय क्रिकेटमा मुसफिकर र तमिमले बंगलादेशका लागि १ सय ७८ रनको सर्वाधिक साझेदारी गरेका थिए। उनीहरुले २०१५ मा पाकिस्तानविरुद्ध ढाकामा यो कीर्तिमान रचेका थिए।

सकिब र महमदुल्लाले नायकीय ब्याटिङ गर्ने क्रममा इतिहास रचे। सकिबले १ सय १५ बलमा १ छक्का र ११ चौकाको सहयोगले १ सय १४ रन बनाए। महमदुल्लाले खेल सकिन १६ बल बाँकी रहेको अवस्थामा एडम मिल्नेलाई स्लिप र गल्लीको बीचबाट चौका प्रहार गर्दै जित दिलाए। उनले १ सय ७ बलमा २ छक्का र ८ चौकाको सहयोगले अविजित १ सय २ रन बनाए।

यी दुई ब्याट्सम्यानका कारण टिम साउथीले सुरुवातमै ३ विकेट लिएको प्रभावशाली प्रदर्शन ओझलमा पर्यो।

यसअघि टस जितेर पहिलो ब्याटिङ गरेको न्युजिल्यान्डका लागि कप्तान केन विलियम्सन ५७ र रोस टेलरको ६३ रनको सहयोगले ८ विकेटको क्षतिा २ सय ६५ रन बनाएको थियो। प्रत्युत्तरमा बंगलादेशले ४७ दशमलव २ ओभरमा ५ विकेट गुमाउदै विजयी लक्ष्य प्राप्त गर्यो।

जितपछि बंगलादेशले सेमिफाइनल यात्रालाई जिवित राखेको छ। समूह ए मा इङ्ल्यान्ड अघिल्लो २ खेल जितेर यसअघि नै सेमिफाइनल प्रवेश गरिसकेको छ। यस अवस्थामा बंगलादेशलाई भोली इङ्ल्यान्ड र अस्ट्रेलियाबीच हुने समूह चरणको अन्तिम खेलको नतिजा महत्वपूर्ण रहनेछ। यो खेलमा इङ्ल्यान्ड विजयी वा खेल बराबरीमा रोकिएको खण्डमा बंगलादेश सेमिफाइनल प्रवेश गर्नेछ। तर,अस्ट्रेलिया विजयी भएको खण्डमा बंगलादेश प्रतियोगिताबाट बाहिरिने छ।