४ महिनाभित्र अमलाको श्रीलंकाविरुद्ध दोस्रो सतक (भिडियो)

हासिम अमलाले श्रीलंकाविरुद्ध यही वर्ष दोस्रो सतक प्रहार गरेका छन्। गत फेब्रुअरीमा आफ्नो घरेलु मैदान सेन्चुरियनमा श्रीलंकाविरुद्ध सतक प्रहार गरेका अमलाले ४ महिनापछि च्याम्पियन्स ट्रफीमा पुनः सतक प्रहार गरेका हुन्।

अमलाले समूह बीअन्तर्गत हाल ओवलमा भइरहेको खेलमा १ सय १२ बलमा सतक पुरा गरे। एकदिवसीयमा उनको सतक संख्या २५ पुगेको छ। श्रीलंकाविरुद्ध उनको पाँचौ सतक हो।

उनले २ छक्का र ५ चौकाको सहयोगले सतक पुरा गरे। यसपालिको च्याम्पियन्स ट्रफीमा अमलाले बनाएको सतक चौथो हो। यसअघि बंगलादेशका तमिम इक्बाल, इङल्यान्डका जोए रुट, न्युजिल्यान्डका केन विलियम्सनले सतक बनाइसकेका छन्।

अफ्रिकाले ४१ दशमलव ३ ओभरको खेल पुरा हुँदा ३ विकेटको क्षतिमा २ सय २६ रन पुरा गरेको छ।